जीजेसी नूतन अध्यक्ष-उपाध्यक्षांचा सत्कार

कोल्हापूर– सराफ व्यावसायिकांसाठी विशेषतः युवा पिढीसाठी आश्वासक, आवश्यक ठरणारी लाभम कार्यशाळा व जीजेसीच्या नूतन अध्यक्ष-उपाध्यक्षांच्या सत्काराचे आयोजन येत्या शनिवारी (ता. ११) येथे केल्याची माहिती जीजेसीचे विभागीय समिती सदस्य भरत ओसवाल व कोल्हापूर सराफ व्यापारी संघाचे अध्यक्ष राजेश राठोड यांनी संयुक्त दिली.

या संदर्भात अधिक माहिती देताना ते म्हणाले, आज प्रत्येक क्षेत्राप्रमाणे सराफ व्यवसायातही आमूलाग्र बदल झाला आहे. पारंपरिक चालणाऱ्या या व्यवसायात नवतंत्रानाच्या सहाय्याने दागिना अधिकाधिक उठावदार होत आहे. त्याचबरोबर व्यवसायातही बदलही खूप झालेत. तसेच हॉलमार्किंग, शासकीय नियम, किचकट कायदेकानून, टॅक्स यामुळे व्यवसाय करू की याकडे लक्ष देऊ, अशी आजची स्थिती आहे. या दृष्टीनेच या व्यवसायासमोर असणाऱ्या समस्या, अडचणींचा आढावा घेण्यासाठी लाभम कार्यशाळेचे आयोजन केले आहे.

ते म्हणाले, कोल्हापुरात प्रथमच तरुण व युवा पिढीचे नेतृत्व करणारे ऑल इंडिया जेम अँड ज्वेलरी डोमेस्टिक कौन्सिलचे (जीजेसी) नूतन अध्यक्ष संयम मेहरा व उपाध्यक्ष राजेश रोकडे येत आहेत. त्यांचे व्यावसायिक अनुभव पश्चिम महाराष्ट्रातील सराफ व सुवर्णकारांसमोर व्यक्त करतील शिवाय एकूणच आढावाही घेतील.

या दोघांबरोबरच जीजेसीचे माजी अध्यक्ष नितीन खंडेलवाल, दिलीप लागू, लाभमचे निमंत्रक साहील मेहरा, चार्टर्ड अकौंटंट भाविन मेहता यांचेही यावेळी मार्गदर्शन होईल. कार्यशाळेसाठी फक्त कोल्हापूरच नाही तर सांगली, सोलापूर, रत्नागिरी, सिंधुदुर्ग आणि बेळगाव येथील व्यावसायिक उपस्थित राहणार आहेत. जीजेसीच्या नूतन अध्यक्ष-उपाध्यक्षांचा पश्चिम महाराष्ट्रातील सराफ संघांच्या वतीने भव्य नागरी सत्कार होईल.

दरम्यान, यावेळी जीजेसीच्या वतीने मुंबई (गोरेगाव) येथे होणाऱ्या प्रदर्शनाची नोंदणीही करण्यात येणार आहे. महाराजा बँक्वेट हॉल, लोणार गल्ली वसाहत, मार्केट यार्ड येथे सकाळी १०.३० वाजता कार्यशाळा होईल. त्यासाठी पश्चिम महाराष्ट्रातील सराफ व सुवर्णकारांनी मोठ्या संख्येने उपस्थित राहण्याचे आवाहनही दोघांनी यावेळी केले.