मुंबई : शिवसेना खासदार संजय राऊत यांची न्यायालयीन कोठडी 5 सप्टेंबर पर्यंत पुन्हा वाढवण्यात आली आहे. संजय राऊत सध्या पत्राचाळ घोटाळा प्रकरणी आर्थर रोड कारागृहात आहेत.

गोरेगाव पत्राचाळ घोटाळा प्रकरणी ईडीने 9 तास चौकशी केल्यानंतर 31 जुलै रोजी रात्री उशिरा संजय राऊत यांना अटक केली होती .यावेळी त्यांना न्यायालयाने 22 ऑगस्ट पर्यंत न्यायालयीन कोठडी सुनावली होती .आता परत न्यायालयाने या कोठडीत वाढ करून 5 सप्टेंबर पर्यंत वाढवली आहे .दोन वेळा जामीन नाकारत इडीने त्यांची कोठडी कायम ठेवली आहे .पत्राचाळ जमीन घोटाळा 1034 कोटी रुपयांचा आहे.

इडीचा आरोप आहे की, गोरेगावातल्या पत्राचाळीत म्हाडाचा भूखंड आहे. गुरु आशिष कन्स्ट्रक्शन जी प्रवीण राऊत यांची कंपनी आहे ,तिला ही चाळ विकसित करण्याचे काम दिले होते .पण त्यांनी या जागेचा काही भाग खाजगी विकासकांना विकला .या जागी बांधलेली घरे काही व्यावसायिकांना वाटून देण्यात आली व त्यातून तब्बल 1034कोटी रुपये राऊतांनी जमवले. त्यानंतर हे पैसे प्रवीण राऊत यांनी त्यांच्या मित्रांच्या व निकटवर्तीयांच्या खात्यात जमा केले .यातील 83 लाख रुपये प्रवीण यांच्या पत्नी माधुरी यांनी संजय राऊत यांच्या पत्नी वर्षा राऊत यांच्या खात्यात जमा केले. या 83 लाख रुपयांतून वर्षा राऊत यांनी दादरमध्ये फ्लॅट घेतला असा आरोप इडीकडून त्यांच्यावर करण्यात आला आहे.राऊत यांच्या कोठडीत वाढ झाल्याने त्यांच्यापुढील अडचणी अजून वाढणार आहेत.