नागठाणे (ता. सातारा) येथील श्रीरामकृष्ण विद्यामंदिर या स्वामी विवेकानंद संस्थेच्या शिक्षण परंपरेत विद्यार्थ्यांच्या मनावर राज्य करणारे शिक्षक म्हणून जनार्दन कांबळे यांचे नाव आदराने घेतले जाते. शिक्षणासोबतच सहशालेय उपक्रम, व्यक्तिमत्त्व विकास, नैतिक मूल्ये, संस्कार यांचा सुंदर संगम घडवत त्यांनी विद्यार्थ्यांच्या शैक्षणिक प्रवासात एक वेगळीच ऊर्जा निर्माण केली आहे.

कांबळे सरांच्या शिकवणीची पद्धत, मुलांशी जिव्हाळ्याचे नाते आणि त्यांच्या वैयक्तिक प्रगतीची घेतलेली काळजी यामुळे ते विद्यार्थ्यांचे अध्यात्मिक मार्गदर्शक म्हणून ओळखले जाऊ लागले. शाळेत विविध उपक्रम राबवून शैक्षणिक जागृतीसह स्वच्छता, शिस्त, वाचन संस्कृती, वक्तृत्व, क्रीडा, कला या सर्व क्षेत्रांत त्यांनी विद्यार्थ्यांना नवे क्षितिज दाखवले.

दरम्यान, त्यांच्या बदलीनंतर विद्यार्थ्यांच्या भावना ओसंडून वाहिल्या. अनेक विद्यार्थी डोळ्यांत पाणी आणून सरांच्या निरोपाला उभे राहिले. शिक्षकाबद्दलची अशी आपुलकी आणि निखळ प्रेम क्वचितच पहायला मिळते. पालक व ग्रामस्थांनाही ही पोकळी जाणवू लागली. त्यामुळेच ग्रामस्थ, पालक आणि विद्यार्थ्यांच्या एकमुखी मागणीनुसार कांबळे सरांना पुन्हा श्रीरामकृष्ण विद्यामंदिरात परत बोलावण्यात आले.

सरांच्या पुनरागमनाने शाळेत आनंदाचे वातावरण निर्माण झाले असून विद्यार्थी पुन्हा उत्साहाने शिक्षणात रमले आहेत. स्वामी विवेकानंद शिक्षण संस्थेच्या या शाळेत कांबळे सरांचे योगदान अनन्यसाधारण ठरले असून लोकप्रिय शिक्षक म्हणून त्यांची छाप अधिक बळकट झाली आहे.

शिक्षण क्षेत्रात समर्पण, संवेदनशीलता आणि स्नेह यांचा मिलाफ कसा असावा याचे सर्वोत्तम उदाहरण म्हणजे जनार्दन कांबळे सर—असे गौरवोद्गार आता सर्व स्तरांतून व्यक्त होत आहेत.