महावितरणला दिले निवेदन

​कोल्हापूर:

गोकुळ शिरगाव व परिसरातील गावांमध्ये महावितरणकडून जुने वीज मीटर काढून 'स्मार्ट मीटर' (Smart Meter) बसविण्याचे काम सुरू आहे. मात्र या प्रक्रियेला रिपब्लिकन पार्टी ऑफ इंडिया (गवई) पक्षाच्या वतीने तीव्र विरोध दर्शवण्यात आला असून, ही कारवाई तात्काळ स्थगित करण्याची मागणी महावितरणच्या अधिकाऱ्यांकडे निवेदनाद्वारे करण्यात आली आहे.

​आर.पी.आय. (गवई) चे महाराष्ट्र प्रदेश उपाध्यक्ष बबनराव स. शिंदे यांच्या नेतृत्वाखालील शिष्टमंडळाने महावितरणचे कार्यकारी अभियंता (ग्रामीण विभाग-२), उपकार्यकारी अभियंता (कागल) आणि गोकुळ शिरगाव शाखा कार्यालयाच्या सहाय्यक अभियंत्यांना हे निवेदन सादर केले.

​निवेदनातील प्रमुख मागण्या व मुद्दे:

• ​तांत्रिक अहवाल व वर्क ऑर्डर द्या: सध्याच्या मीटरमध्ये दोष असल्याचा कोणताही तांत्रिक अहवाल ग्राहकांना दिलेला नाही. त्यामुळे स्मार्ट मीटर बसविण्याचा वर्क ऑर्डर (Work Order), वर्क प्लॅन आणि तांत्रिक अहवाल ग्राहकांना उपलब्ध करून द्यावा.

• ​दबाव व भीतीचे वातावरण थांबवा: मीटर बदलण्याच्या वेळी कर्मचाऱ्यांकडून किंवा ठेकेदाराच्या प्रतिनिधींकडून "पोलीस कारवाई करू" किंवा "सरकारी कामात अडथळा आणल्याचा गुन्हा दाखल करू" अशी भीती दाखवून ग्राहकांवर दबाव आणला जात आहे. ही दडपशाही थांबवण्यात यावी.

• ​कायदेशीर तरतुदींची माहिती द्या: 'इलेक्ट्रिसिटी ॲक्ट २००३' (Section 55) नुसार हे स्मार्ट मीटर नियमानुसार योग्य असल्याचे प्रमाणपत्र आणि या भागातील कम्युनिकेशन्स नेटवर्क चाचणीचा अहवाल देण्यात यावा.

• ​कारवाई तात्काळ स्थगित करा: या लेखी हरकतीवर महावितरणच्या सक्षम अधिकाऱ्यांनी कारणयुक्त व लेखी निर्णय देईपर्यंत परिसरातील मीटर बदलण्याची प्रक्रिया पूर्णपणे स्थगित ठेवावी.

​या निवेदनावर आर.पी.आय. (गवई) चे प्रदेश उपाध्यक्ष बबनराव स. शिंदे यांच्यासह संदीप हेळेकर, शामराव भोसले, विनोद चव्हाण, बी. के. कांबळे, श्रीकांत कांबळे व आप्पासो कांबळे यांच्या स्वाक्षऱ्या आहेत. या मागणीची दखल न घेतल्यास आणि ग्राहकांवर जबरदस्ती केल्यास तीव्र आंदोलन छेडण्याचा इशाराही यावेळी देण्यात आला.