चुये : गहाळ मोबाईल फोनचा शोध घेण्याबाबत पोलीस अधीक्षक नीलोत्पल यांनी दिलेल्या विशेष आदेशानुसार इस्पुर्ली पोलिसांनी उल्लेखनीय कामगिरी केली. पोलिसांनी तांत्रिक विश्लेषणाच्या आधारे सुमारे ३ लाख १५ हजार रुपये किमतीचे १४ गहाळ मोबाईल फोन शोधून काढत ते मूळ मालकांच्या स्वाधीन केले.

अपर पोलीस अधीक्षक (कोल्हापूर) तसेच करवीर विभागाचे उपविभागीय पोलीस अधिकारी यांच्या मार्गदर्शनाखाली ही कारवाई करण्यात आली. इस्पुर्ली पोलिस ठाण्याचे सहाय्यक पोलीस निरीक्षक अभिजित पाटील यांच्या नेतृत्वाखाली पोलीस कॉन्स्टेबल राहुल कांबळे यांनी तांत्रिक कौशल्याचा वापर करून गहाळ मोबाईलचा माग काढला.

मोबाईल परत मिळाल्याने संबंधित नागरिकांनी समाधान व्यक्त केले. त्यांनी पोलीस अधीक्षक नीलोत्पल, सहाय्यक पोलीस निरीक्षक अभिजित पाटील, पोलीस कॉन्स्टेबल राहुल कांबळे तसेच इस्पुर्ली पोलिस ठाण्याच्या संपूर्ण पथकाचे आभार मानले.

गहाळ मोबाईल शोधण्याच्या या तत्पर कारवाईबद्दल इस्पुर्ली पोलिसांचे परिसरातून कौतुक होत आहे.