विरोधकांची महायुती एकवटण्याची चर्चा

 कोल्हापूर आवाज इंडिया प्रतिनिधी 
आमदार satej Patil यांच्या नेतृत्वाखालील गोकुळ निवडणुकी संदर्भात दूध उत्पादक व ठराव धारकांना साथ देण्याचे आवाहन केलेले आहे.
 दूध संघातील राजकीय वातावरण पुन्हा एकदा तापू लागले असून कोल्हापूर जिल्हा सहकारी दूध उत्पादक संघाची निवडणुकीची घोषणा होताच जिल्ह्यातील सहकार राजकारणाला वेग आला आहे. गेल्या काही दिवसांपासून सोशल मीडियावर व्हायरल होत असलेल्या बातम्या, राजकीय पत्रके आणि विविध दैनिकांमधील वृत्तांमुळे गोकुळची निवडणूक राज्यभर चर्चेचा विषय ठरत आहे.
आमदार सतेज पाटील यांनी नुकतेच एक पत्रक प्रसिद्ध करून ठरावदार, दूध उत्पादक संस्था आणि सभासदांना आवाहन केले आहे. “गोकुळ ही केवळ संस्था नसून शेतकऱ्यांच्या विश्वासाची चळवळ आहे. दूध उत्पादकांच्या हितासाठी समविचारी शक्तींनी एकत्र राहणे गरजेचे आहे,” असा संदेश त्यांनी पत्रकातून दिला आहे.
दरम्यान, गोकुळ निवडणुकीत यंदा मोठी राजकीय आघाडी उभी राहत असल्याचे चित्र दिसत आहे. भाजप, शिवसेना, राष्ट्रवादी काँग्रेस, जनस्वराज तसेच इतर काही स्थानिक राजकीय गट हे सतेज पाटील यांच्या विरोधात एकत्र येण्याच्या हालचाली करत असल्याची चर्चा राजकीय वर्तुळात रंगली आहे. दुसरीकडे, सतेज पाटील यांच्या बाजूने समविचारी गट आणि सहकार क्षेत्रातील काही पारंपरिक समर्थक सक्रिय झाल्याचे दिसून येत आहे.
गेल्या निवडणुकीत गोकुळमध्ये सत्तांतर घडवत सतेज पाटील गटाने मोठा विजय मिळवला होता. त्यामुळे यंदाची निवडणूक प्रतिष्ठेची मानली जात आहे. गोकुळची आर्थिक उलाढाल, जिल्ह्यातील दूध उत्पादकांवरील प्रभाव आणि ग्रामीण राजकारणातील महत्त्व लक्षात घेता ही निवडणूक केवळ सहकारापुरती मर्यादित न राहता आगामी स्थानिक राजकीय समीकरणांवरही परिणाम करणारी ठरणार असल्याचे जाणकारांचे मत आहे. 
दरम्यान, मतदार यादी, सभासद पडताळणी आणि काही संस्थांच्या पात्रतेवरून न्यायालयीन प्रक्रिया देखील सुरू असल्याने निवडणूक अधिक रंगतदार होण्याची चिन्हे आहेत. सर्वोच्च न्यायालयानेही काही याचिका फेटाळल्यानंतर निवडणूक प्रक्रियेला वेग आल्याचे मानले जात आहे. 
गोकुळच्या माध्यमातून जिल्ह्यातील सहकार, शेतकरी आणि राजकीय ताकदीची खरी परीक्षा लागणार असून येत्या काही दिवसांत आरोप-प्रत्यारोप, बैठका, पत्रके आणि राजकीय रणनीतींमुळे कोल्हापूरचे राजकारण आणखी तापण्याची शक्यता व्यक्त होत आहे.