कोल्हापूर : शिक्षण, समाजकारण आणि क्रीडा क्षेत्रात भरीव योगदान देणारे पद्मश्री डॉ. डी. वाय. पाटील दादा यांचे मंगळवारी सकाळी निधन झाले. त्यांच्या निधनाची बातमी समजताच त्यांचे अखेरचे दर्शन घेण्यासाठी नागरिकांनी मोठी गर्दी केली आहे. त्यांच्या निवासस्थानी शोकाकुल वातावरण असून दिवसभर विविध स्तरांतील नागरिकांनी उपस्थित राहून श्रद्धांजली अर्पण केली.

आज सकाळपासून शैक्षणिक, सामाजिक, राजकीय, क्रीडा, वैद्यकीय तसेच सांस्कृतिक क्षेत्रातील अनेक मान्यवरांनी डॉ. डी. वाय. पाटील दादा यांच्या पार्थिवाचे दर्शन घेत त्यांना भावपूर्ण श्रद्धांजली वाहिली.

यामध्ये खासदार शाहू महाराज छत्रपती, वनमंत्री गणेश नाईक, विधान परिषदेतील माजी विरोधी पक्षनेते अंबादास दानवे, मंत्री हसन मुश्रीफ, उद्योगमंत्री उदय सामंत, निवृत्त न्यायाधीश बी. जी. कोळसे पाटील, आमदार अमित देशमुख, आमदार जयंत पाटील, आमदार अमल महाडिक, महापौर रूपाराणी निकम तसेच अभिनेते भरत जाधव यांच्यासह विविध क्षेत्रांतील मान्यवरांचा समावेश होता.

याशिवाय शैक्षणिक, सामाजिक, वैद्यकीय क्षेत्रातील अनेक मान्यवर, विविध संस्था व संघटनांचे पदाधिकारी, कार्यकर्ते आणि नागरिकांनीही डॉ. डी. वाय. पाटील दादा यांच्या पार्थिवाचे दर्शन घेत त्यांच्या स्मृतींना अभिवादन केले . त्यांच्या निधनामुळे शिक्षण, समाजकारण आणि सार्वजनिक जीवनात मोठी पोकळी निर्माण झाल्याची भावना उपस्थित मान्यवरांनी व्यक्त केली.