शिक्षकांच्या कमतरतेवर जिल्हा परिषद सदस्यांचा मदतीचा हात
schedule28 Apr 26 person by visibility 8 categoryराजकीय
कमतरतेवर जिल्हा परिषद सदस्यांचा मदतीचा हात
कोल्हापूर (प्रतिनिधी):
पन्हाळा तालुक्यातील पोर्ले येथील जिल्हा परिषद कन्या व कुमार विद्यामंदिर येथे मंगळवार, दि. २८ एप्रिल २०२६ रोजी जिल्हा परिषद कोल्हापूरच्या शिक्षण व अर्थ समितीच्या सभापती सौ. शितल प्रवीण यादव यांच्या अध्यक्षतेखाली शिक्षण आणि मान्सून पूर्व आढावा सभा उत्साहात पार पडली.
गुणवत्ता वाढीसाठी लोकसहभागाचे आवाहन
सभेला मार्गदर्शन करताना सभापती सौ. शितल यादव यांनी शिक्षकांना गुणवत्ता आणि पटसंख्या वाढीसाठी विशेष प्रयत्न करण्याच्या सूचना दिल्या. विशेष म्हणजे, ज्या शाळांमध्ये शिक्षकांची कमतरता आहे, तिथे जिल्हा परिषद सदस्यांनी वैयक्तिकरीत्या मानधन देऊन शिक्षक नियुक्त करावेत, असे आवाहन त्यांनी केले. या आवाहनाला प्रतिसाद देत जिल्हा परिषद सदस्य अमरसिंह पाटील, सौ. पूजा पाटील आणि सौ. शोभा बेलेकर यांनी आपल्या कार्यक्षेत्रात अशा शिक्षकांची नियुक्ती करण्याची जबाबदारी तात्काळ स्वीकारली. संपूर्ण जिल्ह्यात अशाच प्रकारे मानधनावर शिक्षक नियुक्त व्हावेत, अशी अपेक्षाही सौ. यादव यांनी व्यक्त केली.
११ प्रमुख विषयांचा आढावा
प्राथमिक शिक्षणाधिकारी डॉ. सौ. मीना शेंडकर यांनी आगामी शैक्षणिक वर्षाच्या नियोजनासाठी ११ प्रमुख मुद्द्यांवर आढावा घेतला. यामध्ये प्रामुख्याने:
शाळांमध्ये १००% पटनोंदणी करणे.
धोकादायक शालेय इमारतींचे निर्लेखन.
'मिशन अंकुर' अंतर्गत कमी गुणवत्ता असलेल्या शाळांचा विकास.
शाळा प्रवेशोत्सव, मोफत पाठ्यपुस्तके आणि गणवेश वाटप.
प्रधानमंत्री पोषण शक्ती निर्माण योजना आणि NGO/CSR मदतीबाबत सूचना.
डॉ. जयंत नारळीकर गणित-विज्ञान कार्यक्रम आणि इकोक्लब नोंदणी.
मान्यवरांची उपस्थिती व सत्कार
या कार्यक्रमात 'अंकुर' परीक्षेत यश मिळवणाऱ्या शिक्षकांचा आणि पदोन्नतीबद्दल गटशिक्षणाधिकारी शिवाजी मानकर यांचा सत्कार करण्यात आला. सभेला माजी सभापती प्रवीण यादव, पन्हाळा पंचायत समिती सभापती राजेंद्र पाटील, उपशिक्षणाधिकारी शशिकांत बडे व आर. व्ही. कांबळे यांसह अन्य पदाधिकारी उपस्थित होते.
कार्यक्रमाचे प्रास्ताविक गटशिक्षणाधिकारी शिवाजी मानकर यांनी केले, तर आभार मुख्याध्यापिका सौ. संध्या नाईकवाडी यांनी मानले.
