केनवडे–( युवराज राजिगरे- चुयेकर)

करवीर तालुक्यातील चुये – कावणे परिसरात बेंदूर सण शेतकऱ्यांनी मोठ्या उत्साहात साजरा केला. शेतीमध्ये वर्षभर शेतकऱ्याच्या खांद्याला खांदा लावून कष्ट करणाऱ्या आपल्या लाडक्या बैलांप्रती कृतज्ञता व्यक्त करण्याचा हा दिवस. या निमित्ताने बैलांची भव्य मिरवणूक काढण्यात आली.

बेंदूर हा शेतकऱ्यांच्या जीवनातील एक महत्त्वाचा आणि भावनिक सण मानला जातो. आधुनिक काळात ट्रॅक्टरचा वापर वाढला असला, तरी बैलांप्रतीची ही पारंपरिक श्रद्धा आणि कृतज्ञतेची भावना आजही चुयेकरांनी जपली आहे.

सणानिमित्त शेतकऱ्यांनी आपल्या सर्जा-राजाला (बैलांना) न्हाऊ-माखू घातले. त्यांच्या शिंगांना हुरमूस लावण्यात आला. अंगावर रंगीबेरंगी झुली, गळ्यात घुंगरांच्या माळा, नवीन वेसण, म्होरकी आणि कंठा घालून बैलांना सजवण्यात आले. सजवलेले बैल मिरवणूक ठिकाणी आणले गेले.

गावाच्या मुख्य मार्गावरून निघालेल्या या मिरवणुकीत शेतकरी आणि ग्रामस्थ मोठ्या संख्येने सहभागी झाले होते. अनेक ठिकाणी महिलांनी बैलांचे औक्षण करून त्यांना आशीर्वाद दिला. मिरवणूक पाहण्यासाठी लहानथोर मोठ्या संख्येने उपस्थित होते.

मिरवणुकीनंतर शेतकऱ्यांनी आपल्या बैलांना पुरणपोळी, कडबोळी (चकल्या) आणि इतर गोड पदार्थांचा नैवेद्य खाऊ घातला. देवघरात मातीच्या बैलांची मनोभावे पूजा करण्याची प्रथा आजही श्रद्धेने पाळली जाते.