उचगाव : येथील विठ्ठलाई कॉलनी छत्रपती शिवाजीनगर येथे संत बाळूमामांचा वार्षिक भंडारा उत्सव मोठ्या उत्साहात साजरा झाला. गुरुमाऊली कृष्णा डोने महाराज यांच्या उपस्थितीत हा भंडारा मोठ्या लोकांच्या उपस्थितीत मंगलमय वातावरणात आणि हलगी कैताळाचा निनादात पार पडला. यावेळी भजनी मंडळांनी सुद्धा हजेरी लावलेली होती. यामुळे वातावरण आणखीच आध्यात्मिक झाले. दरवर्षी या उत्सवाचे नियोजन छत्रपती शिवाजीनगर मंडळ यांच्याकडून करण्यात येते.  बुधवारी 28 मे रोजी रात्री नऊ वाजता स्वामी समर्थ भजनी मंडळ,  साईनाथ भजनी मंडळ, बाळूमामा संगीत भजनी मंडळ यांच्याकडून भजन सेवा देण्यात आली.  गुरुवारी 29 मे रोजी पहाटे बाळूमामाच्या मूर्तीला अभिषेक, पूजा,आरती करण्यात आली.  सकाळी नऊ वाजता श्रींचे अश्व आले, त्यावेळी भव्य पालखी सोहळा झाला व वालुंग सोहळा सुद्धा झाला हे पाहण्यासाठी हजारो लोकांनी उपस्थिती दर्शवली.  त्यानंतर दुपारी बारा वाजता महाप्रसादाचे वाटप झाले. गुरुमाऊली कृष्णात डोणे महाराज यांच्या हस्ते महाप्रसादाचे वाटप झाले.  हजारो लोकांनी याचा लाभ घेतला.  या संपूर्ण कार्यक्रमासाठी छत्रपती शिवाजी नगर येथील सर्व भक्त परिवाराने परिश्रम घेतले.