NEET परीक्षेतील घोटाळ्याचा निषेध; कोल्हापुरात जिल्हाधिकाऱ्यांना आज निवेदन देणार
schedule15 May 26 person by visibility 16 categoryराजकीय
आवाज इंडिया प्रतिनिधी
कोल्हापूर:
देशातील लाखो विद्यार्थ्यांचे भविष्य अवलंबून असलेल्या NEET परीक्षेत झालेल्या कथित घोटाळ्याचा आणि गैरप्रकाराचा 'वंचित बहुजन माथाडी ट्रान्सपोर्ट व जनरल कामगार युनियन'ने तीव्र शब्दांत निषेध केला आहे. या प्रकरणातील दोषी यंत्रणेवर कठोर फौजदारी कारवाई करावी, या मागणीसाठी युनियनच्या वतीने आज, शुक्रवार दि. १५ मे २०२६ रोजी दुपारी १२:३० वाजता कोल्हापूर जिल्हाधिकाऱ्यांना निवेदन देण्यात येणार आहे.
युनियनने प्रसिद्धीस दिलेल्या पत्रकानुसार, NEET परीक्षा ही केवळ एक परीक्षा नसून ती विद्यार्थ्यांच्या स्वप्नांची आणि कष्टांची जीवनरेखा आहे. मात्र, या परीक्षेत समोर आलेल्या भयंकर गैरव्यवहारामुळे संपूर्ण शिक्षण व्यवस्थेचा विदारक चेहरा समोर आला आहे. हा विद्यार्थ्यांच्या भविष्याशी केलेला विश्वासघात असून, यामुळे विद्यार्थी आणि पालकांमध्ये संतापाचे वातावरण आहे.
या पार्श्वभूमीवर, वंचित बहुजन माथाडी ट्रान्सपोर्ट व जनरल कामगार युनियन, कोल्हापूर जिल्हा व शहराच्या वतीने जिल्हाधिकारी कार्यालयावर निदर्शने करून निवेदन सादर केले जाणार आहे. याप्रसंगी युनियनचे कोल्हापूर जिल्हा अध्यक्ष संजय गुदगे, यादवनगर शाखा अध्यक्ष तुळशीदास धनवडे, उपाध्यक्ष भिमराव कोरगे यांच्यासह अन्य पदाधिकारी व कार्यकर्ते मोठ्या संख्येने उपस्थित राहणार आहेत.
