नेसरी : भाई तुकाराम कोलेकर महाविद्यालय, नेसरी येथील इंग्रजी विषयाचे सहयोगी प्राध्यापक डॉ. दत्तात्रय केरबा कांबळे यांना कृती फाउंडेशन, कोल्हापूर यांच्या वतीने ‘आदर्श शिक्षक पुरस्कार – २०२६’ जाहीर करण्यात आला आहे.
डॉ. कांबळे यांनी गेली १९ वर्षे अध्यापन क्षेत्रात उल्लेखनीय योगदान दिले आहे. त्यांनी एम.ए., एम.फिल. व पीएच.डी. (इंग्रजी) या शैक्षणिक पदव्या प्राप्त केल्या आहेत. बी.ए. व बी.कॉम. स्तरावरील अनिवार्य व ऐच्छिक इंग्रजी, कम्युनिकेशन स्किल्स तसेच इंग्रजी साहित्याचे अध्यापन करताना विद्यार्थ्यांच्या भाषिक कौशल्यांसह लेखन, संवाद आणि साहित्य समीक्षा कौशल्यांच्या विकासावर त्यांनी विशेष भर दिला आहे.
अध्यापनासोबतच अभ्यासक्रमाची प्रभावी अंमलबजावणी, विद्यार्थी मार्गदर्शन, परीक्षा व मूल्यमापन, प्रकल्प मार्गदर्शन तसेच महाविद्यालयातील विविध समित्यांमध्ये त्यांनी सक्रिय सहभाग घेतला आहे. IQAC, NSS, परीक्षा, सांस्कृतिक व साहित्यिक उपक्रमांमध्ये त्यांचे योगदान राहिले आहे. विद्यार्थ्यांसाठी रेमेडियल कोचिंग, सॉफ्ट स्किल्स तसेच स्पर्धा परीक्षांच्या मार्गदर्शनातून त्यांनी विद्यार्थ्यांना प्रोत्साहन दिले आहे.
संशोधन क्षेत्रातही डॉ. कांबळे यांनी भरीव काम केले असून संशोधन प्रबंध, संशोधन पेपर्स, पुस्तके, पुस्तकांचे अध्याय तसेच विविध सेमिनार व कॉन्फरन्समध्ये सहभाग नोंदविला आहे. UGC CARE व peer-reviewed जर्नल्समध्ये त्यांचे संशोधनपर लेख प्रकाशित झाले आहेत.
ICT, PPT, Google Classroom यांसारख्या आधुनिक तंत्रज्ञानाचा वापर करून विद्यार्थी-केंद्रित व नाविन्यपूर्ण अध्यापन पद्धती त्यांनी अंगीकारल्या आहेत. ग्रामीण भागातील विद्यार्थ्यांना शिक्षणासाठी प्रोत्साहन देण्याबरोबरच सामाजिक व विस्तार कार्यातही त्यांनी सहभाग घेतला आहे.
शिस्त, प्रामाणिकपणा, विद्यार्थी-केंद्रित दृष्टिकोन आणि विद्यार्थ्यांशी असलेले मैत्रीपूर्ण व प्रेरणादायी संबंध यामुळे डॉ. कांबळे यांनी शिक्षण क्षेत्रात आपली स्वतंत्र ओळख निर्माण केली आहे.
त्यांच्या या शैक्षणिक व सामाजिक योगदानाची दखल घेत कृती फाउंडेशन, कोल्हापूर यांनी त्यांची ‘आदर्श शिक्षक पुरस्कार – २०२६’ साठी निवड केली आहे. या पुरस्कारामुळे महाविद्यालयीन शिक्षण क्षेत्रातील त्यांच्या कार्याचा गौरव होणार आहे.